Larhun 2020 ezeztatzea eta proiektua berrikustea erabaki dute

Dena hutsetik abiatuko dute. Hala erabaki du Larhun 2020 proiektua kudeatzeko antolatu gidaritza batzordeak joan den ostiralean egin bilkuran. Hasierako proiektua baztertu egin dute, eta elkar aditzeko beste fase bat irekiko dute, elkarteei eta eragileei gogoetan parte hartzeko aukera emanez. Heldu den martxoaren 5ean eginen dute lehen bilkura, Urruñan (Lapurdi).

Josu Iratzoki Agirre Berako (Nafarroa) auzapezak eman zuen gibel egitearen berri, atzo goizean, Euskal Irratietan. Haren hitzetan, bada jadanik bilkura bat baino gehiago Larhungo proiektuari beste begirada bat ematen ari zaiola: «Hasierako zirriborroak gatazka anitz sortu zuen; hura pixka bat alde batera gelditu da. Gidaritza Batzordean erabaki da proiektua berrikusi egin behar dela, eta inguruan garen lau herrien parte hartzea bermatu behar dela. Udalez gain, gainerako elkarteak ere kontuan hartu behar dira».

Pirinio Atlantikoetako Departamenduak izendatutako Andueza kabineteak ebatzi du desegokiak direla Larhungo kaskoan egin nahi zuten pasabidea eta tren geltoki ondoan antolatu nahi zituzten aparkalekuak; horiek ziren, hain zuzen ere, gatazka iturri nagusia. «Kaskoari ahalik eta kalterik gutxien egitea izan da erabakia», azaldu du Iratzoki Agirrek. Haatik, berretsi du trenbideko eta geltokiko lanak nahitaezkoak direla. Aparkalekuei dagokienez, aztertzen ari dira inguruko herrietatik garraio publikoa antolatzea. «Gu lasaitu gara, eta pentsatzen dut elkarteak ere baietz».

«Atrakzio parke bat»

Larhungo kaskoa «atrakzio parke» bilakatu nahi zutela salatu du herritar andana batek 2017ko irailean Pirinio Atlantikoetako Departamenduak Lapurdiko mendi altueneko tontorrean obrak egitea aipatu zuenetik. Larhun Ez Hunki plataforman antolatuta, egitasmoaren aurka egiteko ekintza andana antolatu dituzte proiektuaren kontrakoek.