Asteburuan hamasei hondartza itxi dituzte Lapurdin, uraren kalitateagatik ezin zelako horietan segurtasunez bainatu. Bandera gorria jarri dute horietan guztietan.
Batzuetan, gainera, alga toxikoak topatu dituzte, esaterako, Miarritzen. Ostreopsisa atzeman dute han, itsas belar arriskutsu bat. Duela hiru urte itxi zuten hondatza hori, lehen aldiz, arrazoi hori dela eta.
Ez da hilgarria, baina larruazalean arazoak eragin ditzake ukituz gero, eta gripearen antzeko sintomak eragiten ditu arnasten bada.
Marmokak
Azken egunetan marmokak ere badabiltza kostaldean. Donostian, adibidez, Guardia Zibilaren itsas zerbitzuek zazpi karabela jaso zituzten ostiralean, hondartzara heldu aurretik. Asteazkenean, Ondarretako hondartzan, beste lau marmoka topatu, eta horien presentziaren berri ematen duen bandera jarri zuten sorosleek.
Dena den, adituen arabera, egoera ez da kezkagarria oraingoz, nahiz eta litekeena den datozen egunetan gehiago azaltzea.