Bizkaiko Foru Aldundiak Lamiakoko ibai azpiko autobidearen lanak hasi aurretik, ugaritzen ari dira proiektuaren aurkako mobilizazioak. Duela bi aste, proiektuaren moratoria eskatu zuten Ekologistak Martxan, Greenpeace, Eguzki eta Sukar Horia talde ekologistek, eta asteburuan kanpaldi bat egin dute aldundiari egitasmoa alboratu dezala eskatzeko, Subflubialari Ez plataformak antolatuta. Leioako Artatza parkean egin dute kanpaldia, eta ehunka lagun bildu dira. Azoka, kontzertuak, bertso saioa eta herri bazkari bat egin dituzte, besteak beste. Amaieran, kalean jarraitzeko erabakimena adierazi dute, «proiektua geldiaraztea lortu arte». Hala, beste mobilizazio bat iragarri du plataformak: manifestaziora deitu du otsailaren 8rako, Bilbon.
Plataformak salatu duenez, Getxo eta Portugalete Ibaizabal itsasadarraren azpitik autobide batekin lotzeko proiektua klima larrialdiari aurre egiteko behar diren politiken kontrakoa da. Izan ere, aldundiaren Ingurumen Departamentuaren txosten batek aitortzen duenez, Bilboko metropolian motordun trafikoaren erabilera %33 handitzea ekarriko luke.
Proiektuaren «diru xahuketa handia» ere salatu du Subflubiala Ez plataformak, kanpaldiaren ostean zabaldu duen oharrean. Egitasmoak 450 milioi eurotik gorako aurrekontua du. «Gure iritziz diru hori hobeto legoke inbertituta osasungintzan, zaintzan edo garraio publikoa sustatzean».
Bestalde, ohartarazi dute lanek «kalte handiak» eragingo dituztela ingurumenean. Itsasadar azpiko autobidearen sarreretako bat Leioa eta Getxo arteko Artatzako biribilgunean egin nahi dute, eta Artatza-Erromoko Institutua dago alboan. Lanen zaratak eta kutsadurak ikasleen eta langileen egunerokoan izango duen eragina nabarmendu dute. Gaineratu dute lanek Artatza parkearen heren bat suntsituko luketela.
