LAB sindikatuak auzitara jo du, eta hezkuntza publikoko eskola garraioko eta jolastokietako zaintzaileen arloko patronala salatu. Sindikatuaren iritziz, CIDI Centro Internacional de Idiomas enpresak ─bi arlo horietako patronaleko enpresa nagusia da─ urratu egin du negoziazio kolektiborako eskubidea.
Urtebete baino gehiago da Eusko Jaurlaritzako Hezkuntza Sailaren menpeko eskola garraioko eta jolastokietako zaintzaileen arloko hitzarmena eztabaidatzeko negoziazio mahaia abian dela; eta LABek ohar bidez salatu duenez, patronalak «jarrera esplotatzailea» izan du hasieratik. Hain zuzen, 2024ko otsailaren 23an abiatu zituzten negoziazioak, eta CIDIri leporatu dio hasiera-hasieratik ahalegindu izana negoziazioak blokeatzen.
Are gehiago, azken bileran «harrokeriaz» aritu izana egotzi dio sindikatuak enpresari. LABek azaldu duenez, patronalak erabaki du negoziazioak uztea Eusko Jaurlaritzako Hezkuntza Sailak lizitazioak argitaratu eta adjudikatu arte: «Diru publiko gehiago jaso arte».
Patronalaren jarrera ez ezik, Eusko Jaurlaritzaren jarrera ere gaitzetsi du LABek. Sindikatuak nabarmendu duenez, bai eskola garraioa eta bai jolas orduetako zaintza zerbitzua Araba, Bizkai eta Gipuzkoako eskola publikoetan eskaintzen diren «zerbitzu publikoak» dira, eta, beraz, sindikatuak txartzat jo du zerbitzuok diru publikoarekin kudeatzen diren arren Hezkuntza Sailak patronalaren jarrera ez salatzea, baita «isiltasun konplizez» jardutea ere.
