Sostengu andanarekin aurkeztu zen atzo arratsaldean Karfa Sira Diallo militante antirrazista Baionako epaitegira. G7aren goi bileraren garaian, protesta bat antolatu zuen Miarritzeko (Lapurdi) geltokian, auzoaren izen arrazista salatzeko: La Negresse. «Zalaparta» egitea leporatuta, bortizki atxilotu zuen Frantziako Poliziak, eta haien kontra jazartzeagatik auzipetu zuten gero. Prokuradoreak 500 euroko isuna eskatu zuen atzo haren kontra, eta parte zibil gisa jarritako bi polizien abokatuak, 500 euro eta euro bateko kalte ordainak. Defentsako abokatuek poliziaren «gezurrak» nabarmendu zituzten, eta Diallo errugabetzeko eskatu. Urtarrilaren 14an emanen du erabakia epaitegiak.
Beltzen trafikoaz eta esklabotzaz oroitzeko Memoires et Partages (Oroimenak eta Partekatzeak) elkarteko zuzendaria da Diallo. 2019ko abuztuaren 22an, Miarritzeko geltokira joan zen beste kide batzuekin, G7koen goi bileraren mediatizazioa baliatuz, geltokiko auzoak duen La Negresse izena salatzeko. XIX. mendean, Napoleonen soldaduek auzo horretako ostatu batean ari zen emazte beltz bati jarri izena da La Negresse. Lehenago, eta arras berriki arte, euskal toponimoz izendatzen zen auzoa. Hector Iglesias ikerlariak 2000. urtean aurkeztu zuen tesi lanaren arabera, geltokiaren inguruko auzo hori Harausta, Harrausta, Heustarre edo Eguastarre deitzen zuten euskaldunek, eta dokumentuetan ere hala ageri da. Heustarre izena XX. mendearen hondarrera arte erabili izan da. Atzoko auzian, La Negresse izenak berekin dakarren «umiliazioa» aipatu zuen Diallok: «Emakume beltzenganako irain bat da».
Poliziaren «zauriak»
Bozgorailu batekin eta mikrofonoa eskuan egin zuen protesta Diallok 2019ko abuztuaren 22an, «lasaiki, baina haserre». Hogei minutu iraun zuen, Frantziako Polizia agertu zen arte. Identitate kontrola egin zioten lehenik; gero, mikroa kendu, eta bortizki atxilotu zuten. Lurrera bota eta hiru polizia gainean etzan zitzaizkion. «Bertan ziplo gelditu nintekeen», esan zuen atzo.
Mathieu Vallet SCIP komisarioen sindikatuko idazkari nagusia izan zen atxilotu zuen polizietako bat, eta berak idatzi zuen atxiloketa akta: «lau bazter nahasle» zeudela, «afrikar itxurakoak», Diallo «zalapartan» ari zela, «harrabotsa» egiten, «asaldatua», «biziki zainetan», eta «alde guzietara jestuka» ari zela, eta poliziei «jazarri» zela. Eskuan «zauri» bat zuelako, bi eguneko geldialdia eman zioten atxiloketan parte hartu zuen beste polizia bati.
Collette Capdevielle eta William Bourdon defentsako abokatuek poliziaren bertsioa gezurtatu zuten. Haien hitzetan, ez dago arau hauste bat bera ere notifikatua; ez da indarkeria bakar bat ere egiaztatua. «Bortizkeria izan dela errateko, bortizkeria horren froga eman behar da; medikuaren ziurtagiria ez da froga bat», ohartarazi zuen Capdeviellek. Poliziaren «pupua» aipatu zuen ironikoki Bourdonek. Militante «bakezale eta humanista» gisa aurkeztu zuten Diallo, polizien kontraerranak argitara emanez.
Halaber, Frantziako Poliziaren jokamoldeak auzitan eman zituen Bourdonek. Aipatu zuen Cedric Chouviaten familiaren abokatua dela —Poliziaren eskuetan hil zen urte hasieran, itoa, atxilotzeko orduan hiru poliziak gorputz osoz zapaldu ondoren—, eta berriki polemika sortu duen Michel Zecler musika ekoizlearen kontrako polizia bortizkerien afera ere gogorarazi zuen: «Badakigu Frantziako Poliziak sekulako gezurrak idazten dituela atxiloketa aktetan». Diallo errugabe jo eta zinezko arazoari heltzeko dei egin zuten bi abokatuek: La Negresse auzoaren izen arrazista. Horri buruzko helegitea ezarria dute Administrazio Auzitegian.
'La Negresse' auzo izena salatu zuen militantea epaitu dute
Miarritzen atxilotu zuten, protesta batean, eta Poliziari jazartzea leporatu zioten. Poliziaren «gezurrak» salatu ditu defentsak
![Collette Capdevielle, Karfa Sira Diallo eta William Bourdon, atzo, Baionako epaitegian. BOB EDME. Collette Capdevielle, Karfa Sira Diallo eta William Bourdon, atzo, Baionako epaitegian. BOB EDME.](https://www.berria.eus/uploads/s1/68/41/84/p010-f01.jpeg)
Iruzkinak
Ez dago iruzkinik
Ordenatu