Poliki-poliki adin guztietako pertsonak batu ziren euskaldun izaeraren harrotasuna erakusteko: gazteena, dudarik gabe, zazpi asteko Briella izan zen, eta ama-amamekin egin zuen ibilbidea.
Hamarrak jo berritan, euriari jaramon egin gabe, pankartaren atzean kokatu ziren 50 lagun inguru ibilaldia egiteko: lehenik, Euskal Etxeari bira eman, eta, gero, Kapitoliorainoko joan-etorria egin zuten.
Boiseko euskaltzale askok parte hartu zuten ibilaldian; baita Boise Unibertsitateko Euskal Ikasketetako irakasleak (Nere Lete eta Larraitz Ariznabarreta), Ikastolako zuzendariak, andereñoek eta haurrek ere; Euskal Museoko langileek, EHUko errektore ohi Iñaki Goirizelaiak, Euskal Herritik Boisera ikastera etorritako ikasleek, eta hiriko gazte, guraso eta laguntzaile askok.
