Kontseilu Sozialistak jakinarazi du Bilbon okupatua zuten lokal bat hutsarazi diela Poliziak gaur goizean. Goizeko bederatziak aldera joan dira ertzainak eta Bilboko udaltzainak, eta bertan zeuden kideak aterarazi dituzte. Kontseilu sozialistak salatu du aurrez jakinarazi gabe joan direla, eta ez dietela lokala husteko agindu judizialik erakutsi. Atea «kolpeka» zabaldu ondoren, Poliziak kide batzuk identifikatu dituela azaldu dute.
Deustu auzoan dago lokala, eta urte hasieran okupatu zuen Kontseilu Sozialistak. Haien esanetan, «jabe ugari» ditu lokalak, eta urteak zeramatzan hutsik, erabilerarik gabe. Aresti Zentro Sozialista izenpean, urtarrilean zabaldu zuten, «langileriaren antolakuntza independentea sustatzeko eta bizi baldintzen okertzeari aurre egiteko» erabilera anitzeko eremu gisa.
«Burgesiak eskura dituen bitarteko guztiak baliatzen ditu langileriaren antolakuntza independentea deuseztatzeko eta enpresarien jabetzak bermatzeko», salatu dute ohar batean. Kontseilu Sozialistak protestara deitu du arratsalderako:18:30ean elkarretaratzea egingo dute, Bilboko epaitegiaren aurrean.
🔴🔴𝐊𝐎𝐍𝐓𝐙𝐄𝐍𝐓𝐑𝐀𝐙𝐈𝐎𝐀
— Kontseilu Sozialista Bilbo (@Kontseilua_Bilb) July 18, 2024
Bilboko Aresti Zentro Sozialistaren desalojoa salatzeko kontzentrazioa:
🗓️ Gaur, osteguna
🕓 18:30
📍 Bilboko Epaitegietan (Buenos Aires, 6)
Langileriaren eskubide politikoen defentsan, Zentro Sozialistak aurrera! pic.twitter.com/kVToMTryDg
