Klima baino beroago

Klimaren borroka jendartearen geroaren borroka da. Ez da galdua, eta ez da irabazia. Orain jokatzen ari da!». Hitz horiekin laburbildu zuen atzo Joan Indaburu Alternatibako kideak berotze klimatikoari aurre egiteko borrokan duten erronka nagusia: herritarren mobilizazio masibo baten bidez egoera errotik aldatzea. 5.800 kilometroan 200 lurralde zeharkatu ondotik, atzo iritsi ziren Baionara, bizikletaz, atzo eta gaur antolatuak dituzten Alternatiba Egunetara. Ekitaldi alai eta koloretsua egin zuten, bataila «hemen eta orain» jokatzen ari dela aldarrikatzeko. «Aterabideak baditugu, alternatibak badira, hor dira, gure eskupeetan. Eta gizarte zuzenago, humanoago, eta iraunkorrago baten sortzeko mentura dira», adierazi zuen Indaburuk. Baina, alternatibez gain, proiektu «erraldoi eta behar gabekoei» aurre egiteko beharra azpimarratu zuen, «masiboki», horretarako desobedientzia zibileko ekintza ez-bortitzak antolatzera deituta. «Elkarrekin eraikitzen duguna klimaren aldeko herritar mugimendu zabal, ez-bortitz, errotikako eta deliberatua da», egin zuen deiadar, publikoa animatzeko asmoarekin. Eta animoz beteta erantzun zion publikoak, «bero, bero, klima baino beroago» oihu eginez.

Hitzaldi andanak osatu zuten ekitaldi nagusia, besteak beste, Edgar Morin filosofoaren bideo batekin. Valerie Masson-Delmotte paleoklimatologoak ere zuzeneko konexioa egin zuen Hego Koreatik. IPCCren txostena onartzen aritu dira azken egunetan, eta bertan parte hartu du. Gogorarazi zuen 90 adituren parte hartzea izan duela txostenak, eta 6.000 artikulu zientifiko izan dituela oinarri. Baina ezin izan zuen edukian eta ondorioetan sartu, bihar argitaratuko baitute txostena.

Paristik Baionara mobilizatzeko deia egin zuten, eta Euskal Herriko eta Frantziako 60 proiektu altenatibotako ordezkariak igoarazi zituzten eszena gainera, rap doinuen artetik. Han ziren besteak beste, euskal moneta, Enercoop, Greenpeace, Attac, Etorkinekin, Publizitatearen Erasoekiko Erresistentzia, Otsokoop edo nuklearren kontrako kolektiboa. «Ezinbestekotzat» jo zituzten eragile horiek guziak, «sistema aldatzeko, eta ez klima».

Ekintzarako deia ere egin zuten, BNP Paribas bankuaren egoitza batetik aulkiak lapurtzeagatik auzipetua izan zen Jon Palaisen ahotik. Abenduaren 14an, Societe Generale bankuaren Parisko egoitza «garbitzera» deitu zuten, «oso zikina delako». Ekintzan parte hartzeko izena ematea proposatu zieten bertaratutakoei.

Gogoeta eta ekintza

Egun guzian hitzaldi andana antolatu zituzten Baionako Unibertsitatean, eta ingurumenaren aldeko borrokak eta bestelako gizarte bat eraikitzeko bidean lanean ari diren eragileei hitza eman zieten. Bi egunetan proposatu dituzten desafioei lotutako engaiamenduen formularioak biltzen ere hasi ziren; gaur erran beharra dute zenbat konpromiso bildu dituzten asteburuan.

Gaur izanen da ekitaldi nagusia, 17:30ean, Esperantzaren eta ekintzaren garaia da lelopean, Euskal Herriko eta nazioarteko hizlariekin. Atzo bezala, kontzertuekin bukatuko da eguna.