Urtero legez, Espainiako altxamendu faxistan hil ziren EAE-ANVko gudariak omenduko dituzte, Abertiako gainean. Igandean egingo dute omenaldia, Eusko Lurra fundazioak antolatuta. Aurten, Gernika batailoia omenduko dute, haren 80. urtemugan, eta batailoiko buru izan zen Kepa Ordoki ekarriko dute gogora, EAEko militante zena. Eusko Lurrak EAEko militanteek nazien kontrako borrokan aritu zen Gernika batailoiari egin zioten ekarpena nabarmenduko du.
Ekitaldiaren helburua "EAEko ehunka militanteen ideien bandera" zutitzea izango da, antolatzaileen esanetan.
Omenaldia egunerdian izango da. Ekitaldi politikoa egingo dute 13:30ean, Abertiako hariztian. Ondoren, herri bazkaria egingo dute.