Karrera eta Aspiazu aldi baterako Espainiaratu dituzte, han epaitzeko

PARIS. Frantziako Estatuak Espainiako Justiziaren esku utziko ditu Mikel Karrera eta Garikoitz Aspiazu euskal presoak, aldi baterako. «Itxi gabe» dauden auziengatik epaituko dituzte, eta, ostean, Frantziara itzuliko dituzte, han dituzten zigorrak bete ditzaten. Karrera ostiralean epaituko dute, Espainiako Auzitegi Nazionalean, ETAko bi kidek erabilitako furgoneta bat alokatzeagatik. Aspiazuren aurkako epaiketa, berriz, irailaren 2an egingo dute. 2001ean Jose Maria Lidon Bizkaiko Probintzia Auzitegiko epailea hiltzeko atentatuan parte hartu izana leporatzen diote.