Atzo arratsaldean Bilboko erdialdean zeuden kaleko saltzaile batzuei jazarri zitzaien Polizia: haien atzetik joan ziren, jo egin zituzten, eta saltzen ari ziren materiala kendu zieten. Dozenaka udaltzain eta ertzainek parte hartu zuten Bilboko Kale Nagusian zabaldutako esku hartzean, eta tentsio momentuak izan ziren, herritar batzuek Poliziari haren jokabidea aurpegiratu ziotelako eta saltzaileei laguntzen saiatu zirelako.
🤬Tentsioa Bilboko Kale Nagusian, saltzaile ibiltarien aurkako polizia-ekintza baten ondorioz.
— LAB Bilbo (@LABbilbo) April 4, 2024
Pertsona manteroak langileak dira.
Kriminalizazioari ez. Arrazakeria polizial eta instituzionalari ez.
Elkartasuna antolatu dezagun!👇🏽👇🏿👇🏼 pic.twitter.com/X7jbMcdiHR
LAB sindikatuak ere Poliziaren jokabidea txarretsi du, ohar bidez. Sindikatuak «arrazismo poliziala» eta «indarkeria instituzionala» salatu ditu, eta «neurrigabetzat» jo Poliziaren erantzuna. «Kaleko saltzaile izatea ez da delitua; lan hori egiten dutenak langileak dira», azpimarratu du. Halaber, gogoratu du milaka pertsona migraturen eta arrazializaturen «bizirik irauteko estrategia» dela kopia piratak saltzea.
Bilbon atzo gertatutakoa ez dela kasu bakana gogoratu du LABek, «gero eta ohikoagoak direlako etnia eta arrazaren araberako erregistroak, eta estigmatizatzen eta kriminalizatzen diren langileen aurkako operatiboak». Are, salatu du EAJ agintean den erakundeetan halako jokabideak «legitimatu eta babesten» direla. LABek administrazioei eskatu die jazarpena albo batera utzi eta pertsona guztien eskubideak errespeta ditzatela.
Bilboko alkate Juan Mari Aburtok, berriz, Poliziaren jokabidea txalotu du, eta adierazi «legea betetzen» ari zela. Radio Euskadin egin dituen adierazpenetan, Aburtok esan du halako kasuetan «interes kontrajarriak» egoten direla, eta tokian tokiko merkataritzak ere bere interesak defendatzeko eskubidea duela.
