Espetxe Zaintzako Epaitegiak bigarren aldiz kendu dio hirugarren gradua Joseba Arregi Erostarbe euskal presoari. Fiskaltzak jarritako helegitea kontuan harturik, Jose Luis Castro epaileak auto baten bidez arrazoitu du bere adina ez dela nahikoa hirugarren gradua emateko, eta ukatzeko arrazoien artean «biktimekiko posizioa» aipatu du.
Iazko martxoan, Eusko Jaurlaritzak hirugarren gradua eman zien Basauriko (Bizkaia) eta Martuteneko (Donostia) espetxeetan zeuden motibazio politikoko zortzi presori, zigorraren bi herenak edo hiru herenak beteak zituztelako. Horietako bat zen Arregi Erostarbe —30 urte zeramatzan preso—. Fiskaltzak helegitea jarri zuen, eta Espetxe Zaintzako Epaitegiak atzera bota. Iazko azaroan Martuteneko kartzelara itzuli behar izan zuen.
Hain zuzen ere, Sarek salatu egin zuen Arregi Errostarberen kasua, fiskaltza eta Espetxe Zaintza graduen erregresioa bultzatzen ari direlako, bata helegiteen bidez, eta bestea haiei bide emanez.
Orain, Castro magistratuak esan du Arregi Erostarberen adina ez dela aski gradua emateko. «70 urtetik gorakoak automatikoki kartzelatik at uztea ez dago jasota». Haren esanetan, presoaren osasun egoerak ez du okerrera egin.
