Ezker abertzaleko eta PSEko bi kide historiko elkarrekin eseriko dira datorren asteartean, Iruñean, politikaz hitz egiteko, hitzaldi batean: Patxi Zabaleta HBren sortzaileetako bat eta Aralarreko koordinatzaile nagusia —2001etik— eta Jesus Egiguren PSE-EEko presidentea —2002tik—.
Katakrak-La Hormiga Atomika liburu dendaren aretoan izango da saioa —Kale Nagusia, 54, behea—, 19:00etatik aurrera, Aralarren fundazio Ezkerraberrik antolatuta. Gazteleraz izango da.
Egigurenek bere azken liburua aurkezteko baliatuko du: Euskal Herria, por un nuevo nacionalismo, vasquismo y navarrismo (Euskal Herria, abertzaletasun, baskismo eta nabarrismo berribaten alde). Apirilaren 9an aurkeztu zuen, eta, Nafarroa ardatz hartuta, Euskal Herriaren kontzeptua berreskuratu beharraz hitz egiten du. «Ez da gehiengoa duen tesia, baina balekoa da. Xumea da asmoa», idatzia du.
Zabaletak politika batez ere Nafarroan egin izan du, Iruñeko zinegotzi edota Nafarroako parlamentari gisa.
Jesus Egiguren eta Patxi Zabaleta, asteartean Iruñean elkarrekin
Katakrak-La Hormiga Atomikaren aretoko hitzaldi batean ariko dira PSEko eta Aralarreko kideak
Iruzkinak
Ez dago iruzkinik
Ordenatu
