Zeru urdinaren pean eta turista taldeak joan-etorrian zebiltzala abiatu da «etxebizitza eskubide unibertsalaren» aldeko manifestazioa Donostiako Bulebarretik, 12:15ean. Jende andana bildu da Euskal Herriko Etxebizitza Sindikatu Sozialistak deituta, administrazioei galdegiteko «etxebizitzaren negozioa» bukaraztea, besteak beste. Martxaren burua 13:00etarako iritsi da berriz Bulebarrera, udaletxe aurrera, eta atzeko aldea Viktoria Eugenia antzokiaren bihurgunearen atzean galtzen zen oraindik. Errepidea moztuta zegoela, Asiako turistek ez dute aukera alferrik galdu kamerei eragiteko: klik, klik.
Ordu arte, erdiguneko kaleetan barrena ibili da manifestazioa, Euskal Herriko metro koadro garestienetakoa duten etxeen artean; hain gertu eta hain urrun. Bulebarretik pasatzean, udaletxe aldera, bazterrean utzi dute inguru horretako etxe agentzia ezagun bat. Nabarmendurik erakusten ditu salneurri batzuk: Salamanca pasealekuan, 1.520.000 euroko etxe bat; Peña eta Goñi kalean, 1.750.000 euroko beste bat; baina badira merkeagoak ere: Aingeru kaleko bat neon argiz erakusten du, 800.000 eurokoa, eta, Zorroagako bat 980.000 eurokoa.
Gazte ugarik —baita ez hain gazteek ere— bat egin dute «etxegabetzeak gelditzeko», «turismoaren negozioari aurre egiteko», «arrazakeriaren aurka klase batasuna» erreibindikatzeko eta «Desokupa suntsitzeko» deia zabaltzeko. Aner eta Idoia gazteek, donostiarrak biak, ibilbide osoa egin dute, irizten baitiote egoera ezin dela «gehiago jasan». Nekane gipuzkoarra da, 60 urte ditu, eta «semearen eta iloben alde» manifestatu da, gertatzen ari dena «lotsagarria» delakoan.
«Ezker-eskuin, denak berdin»
Bizi-bizi joan da martxa, arrazakeriaren aurkako Euskal Herri osoko hogei eragilek baino gehiagok babestuta, eta erreibindikazioak etengabe entzuten zirela. Autobusak etorri dira Donostiara, besteak beste Gasteiztik. Etxegabetzeen Aurkako Suhiltzaileen Plataformako ordezkariak ere han izan dira. Baita esku hartze sozialean lan egiten duten behargin asko ere.
Banderak ere zabaldu dituzte, gorriak denak. Etxebizitzaren arazoa «klase borrokarekin» lotu dute antolatzaileek manifestazioaren bukaeran egindako hitzaldian. «Ezker-eskuin, denak dira berdin» entzun da sarritan, Euskal Herriko Etxebizitza Sindikatu Sozialistak deitutako mobilizazio handian. Sindikatuko ordezkari bik gehiago garatu dute ideia hori: «Etxebizitzaren arazoa ezin da konpondu etxebizitzaren negozioa finantzatuz. Hala ere, alderdi guztiek, ezkerretik eskuinera, hori sinetsarazi nahi digute. Ezinbestekoa da alderdiek hartutako neurrien faltsukeria agerian uztea. Neurriek negozioa indartzeko helburua dute, baina alderdi sozialdemokratek gure arreta desbideratu nahi dute ongi ikusiak diren neurri horien publizitatea eginez».
«Etxebizitzaren arazoa ezin da konpondu etxebizitzaren negozioa finantzatuz. Hala ere, alderdi guztiek, ezkerretik eskuinera, hori sinetsarazi nahi digute»
EH-ko ETXEBIZITZA SINDIKATU SOZIALISTA
Ordezkari berak salatu du etxegabetzeak ez direla gelditu, nahiz eta administrazioen azken arauek helburu hori izan: «Ez dute egiazko neurririk proposatu prezioak jaisteko. Polikiago igotzea ez da jaistea, mantsoago pobretuko gaituztela bermatzea baizik, eta jendea etxetik isilpean botatzea ez da etxegabetzeak debekatzea, arazo soziala ezkutatzea baizik».
«Gure miseria, zuen aberastasuna»
Beste ordezkari batek esan du etxebizitzaren auzia «langile klasearen ikuspuntutik soilik» dela arazo bat. Enpresarien eta errentatzaileen ikuspuntutik, ez dago arazorik, adierazi duenez. Are, salatu du prezioak igota etxebizitzaren merkatua «inoiz baino errentagarriagoa» bihurrarazi dutela: «Gure miseria haien aberastasuna da». Gaineratu du etxebizitzaren arazoa ez dela «abstraktua», «langile klasearena» baizik.
Egoera horrek kalte egiten die, batik bat, «emantzipatzea ezinezkoa» duten langile gazteei, eta Etxebizitza Sindikatu Sozialistako ordezkariak abisu bat eman du: «Ez da aldi baterako arazoa, baizik eta pobretze prozesu baten aurrerapena». Herritar «arrazializatuak eta migranteak» ere propio aipatu dituzte, «miseriazko baldintzak» dituztelako, eta «etxebizitza merkatuaren arrazakeriari» aurre egin behar diotelako.
Sindikatu Sozialistak nabarmendu du benetako irtenbide bakarra zera dela, «doako etxebizitza unibertsala eta kalitatezkoa» bermatzea, «merkantzia izaera» ezabatuta. Gainera, mobilizatzera deitu dute «egiturazko aldaketak» lortzeko: «Eskubideak antolakuntzaren bidez konkistatzen eta mantentzen dira». Udaletxearen inguruan, Bulebarrean, sartu ezinik egon da jendea bukaerako hitzaldia entzuten eta txalotzen.
