Jaurlaritzaren egoitzara sartu dira hezkuntzako grebalariak

Manifestazioa bukatzeko, sindikatuetako ordezkariek zuzenean eman nahi izan dizkiote euren eskakizunak Hezkuntza sailburu Begoña Pedrosari. Manifestariak ere saiatu dira sartzen, baina ertzainek bidea itxi diete. Eserialdia egin dute.

Greban dauden irakasleak, Eusko Jaurlaritzaren egoitzaren aurrean eserita, protestan. BERRIA
Kerman Garralda
Gasteiz
2025eko apirilaren 2a
14:45
Entzun 00:00:0000:00:00

Bederatzigarren eta azken greba eguneko manifestazioa bukatzeko, Steilas, LAB, ELA eta CCOO sindikatuetako ordezkariak Eusko Jaurlaritzaren Lakuako egoitzara sartu dira, orain arteko manifestazioetan grebalarien artean bildu dituzten eskakizunekin; harreratik hots egin diote Begoña Pedrosari, baina Hezkuntza sailburua ez da jaitsi. 13:00ak ziren ordurako, eta 13:30ean Eusko Legebiltzarreko Hezkuntza batzordean izan da Pedrosa. Sindikalistek harreran utzi dituzte eskakizunak.

Kanpoan milaka manifestari egon dira zain. Haiek ere saiatu dira Jaurlaritzaren egoitzara sartzen, baina ertzainek bidea trabatu diete. Aurka egin gabe, eseri egin dira, eta oihuka jardun dute: «Irakasleok, borrokan», «Pedrosa, tranposa, entzun gure ahotsa» eta tankerako mezuak zabaldu dituzte.

Sindikatuetako ordezkariak egoitza barrutik atera direnean, txalo artean jaso dituzte kideek. Orduan bukatu dituzte eguneko mobilizazioak.

Eusko Jaurlaritzak esana du grebak iraun bitartean ez duela negoziatuko. Atzo, Maria Ubarretxena Eusko Jaurlaritzako bozeramaileak esan zuen akordioak lortzeko borondatea «irmoa» dela. «Baina, negoziazioak aurrera eramateko, lasaitasuna behar da. Horregatik, sailak erabaki du mobilizazioak amaitu arte itxarongo duela negoziazioak berriz hasteko».

Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Kazetaritza propio eta independentearen alde, 2025 amaierarako 3.000 irakurleren babes ekonomikoa behar du BERRIAk.