Eusko Jaurlaritzak argitara eman du Aiarako eta Amurrioko (Araba) lurretan egin asmo duten eguzki parkearen ingurumen eraginari buruzko txostena. EAEko aldizkari ofizialean gaur argitaratu dutenez, gobernuak ez du uste Ventaja Solar 8 enpresaren FV Igebelar Solar egitasmoak «eragin negatibo nabarmenik» izango duenik.
Jaurlaritzaren ebazpenak zenbait babes eta zuzenketa neurri ezartzen ditu, «proiektuak ingurumenean ondorio kaltegarri nabarmenik izan ez dezan», eta ez dadin beharrik izan Igebelar Solar proiektuaren ingurumen inpaktuaren ebaluazio arrunta egiteko. Neurri horien artean daude natura ondarea, landa ingurunea, eta paisaia eta kultura ondarea babesteari begirakoak eta zarata gutxitzea helburu dutenak, besteak beste. Enpresa sustatzaileak neurri horiek txertatu beharko ditu proiektuan ingurumen eraginari dagokion baimena jasotzeko.
Azpiegitura eraikiko balitz, eguzki energia ekoizteko 6.692 plaka izango lituzke, eta 3,4 megawatteko potentzia. Proiektuan zehaztutakoaren arabera, parkea Amurrioko herrigunetik kilometro erdira egongo da gutxi gorabehera, herriaren mendebaldean, eta Aiarako eremu bat ere hartuko du. Guztira 3,83 hektarea izango ditu.
