Atzo arratsaldean zabaldu zuen Eusko Jaurlaritzako Hezkuntza Sailak berria: heldu den ikasturtean ikastetxe publikoen arteko integrazio prozesuak abiaraziko dituzte Gasteizen eta Portugaleten (Bizkaia). Eskoletako segregazioaren aurka egite aldera hartutako erabakiak direla azaldu zuen, eta batzeko bidean zein eskola jarriko dituzten zehaztu zuen: Arabako hiriburuan Aita Orbiso eta Umandi Ikastola izango dira, eta Bizkaiko kostako udalerrian, Maestro Zubeldia eta Virgen de La Guia. Handik ordu batzuetara, Steilas sindikatuak kritikatu egin zuen erabakia. «Fusioak baino, itxierak» goiburua jarri zion atera zuen prentsa oharrari.
«Bi eskola publiko bat egitea ez da kasualitatearen emaitza, aplikatu duten hezkuntza politika pribatizatzaileen ondorio zuzena baizik, horietako bat ixtea baitakar bi eskola fusionatzeak», salatu du sindikatuak. Azken urteotan izan diren aldaketa demografikoak gogora ekarri ditu: jaiotza tasaren apaltzea eta migratzaileen ugaritzea. «Horiek aukera leiho bat ireki zuten EAEko hezkuntza sistema dualaren arazo nagusiak konpontzeko: eskola segregazioa eta euskalduntze eskasa», argudiatu du.
Bide horretan neurri eraginkorrik ez dela hartu uste dute, ordea, sindikatuko kideek. «Klase politikoak betikotu egin ditu euskal hezkuntza sistemaren arazoak, egiturazko konponbideak eman beharrean», adierazi dute. Bide horretan, propio kritikatu nahi izan dute, berriro ere, Hezkuntza Legea; iaz onartu zuten Eusko Legebiltzarrean, datozen urteetan hezkuntza politikak izan beharko dituen jarraibideak ezarri ditu, eta bertan Euskal Hezkuntza Zerbitzu Publikoa «deiturikoa» eratzeko bideak jarri izana bide okerra da, sindikatuko ordezkarien ustez «Hezkuntza publikoa eta pribatua berdintzeko alferrikako ahalegina da, eta eskubide berberak ematen zaizkie, ustez betebehar berberak bete ditzaten».
Lege esparru hori ezartzeaz harago, Jaurlaritzari egotzi diote, gainera, beren-beregi sare pribatuaren aldekoak diren «dekretuak» ere onartzea. Hezkuntza Sailari eskatu diote sakoneko aldaketa bat egiteko eta «inertzia pribatizatzailea» gainditzeko erabakiak hartzeko.
