Araban, Bizkaian eta Gipuzkoan eguneratu egin dituzte giza papilomaren birusaren (GPB) aurkako txertoa jartzeko gomendioak. Oraingo aldaketekin, 12 eta 25 urte bitarteko gazte guztiak txertatu nahi dituzte, dosi bakarrarekin —lehen, bi dosi ziren—, eta arrisku jakin batzuk dituztenei ere txertatzea aholkatuko die Eusko Jaurlaritzako Osasun Sailak.
Ikasturte honetan giza papilomaren birusaren aurkako txertoa hartzea egokitzen zaie 2013. urtetik aurrera jaio ziren haurrei, hots, Lehen Hezkuntzako 6. maila egiten ari diren ikasleei. Bide batez, 2009an, 2010ean eta 2011n jaiotakoak ere txertatuko dituzte ikasturte honetan eta hurrengoan. Dosi bakarra beharko dute, eta eskola eremuan edo osasun zentroan hartu ahal izango dute, aurtengo ikasturtean eta hurrengoan.
25 urtera arteko guztiek txertoa hartu dezaten nahi du Osasun Publikoaren eta Adikzioen Zuzendaritzak, ohar batean adierazi duenez, eta, haiek erakartzeko, kanpaina «masibo» bat abiatuko dute eskola eremuan eta osasun zentroetan. Espero dute 12 urtetik gorako mutil eta gizon guztiak txertatzea, baita bere garaian txertatu ez ziren emakumeak txertatzea ere.
Izan ere, 1995ean sartu zuten lehen aldiz GPBaren aurkako txertaketa sistematikoa Arabako, Bizkaiko eta Gipuzkoako haurren txertaketa egutegian, neskentzat soilik. Orain, Euskadiko Txertoen Aholku Batzordeak aholkatu du txertaketa egutegian aldaketak egitea, OME Osasunaren Mundu Erakundearen gomendioak oinarri hartuta: 12 eta 25 urte bitarteko pertsonei dosi bakarra jarriko diete, bai neskei eta baita mutilei ere.
Bide batez, arriskuren bat dutenei ere gomendatu die txertaketa Osasun Sailak: esaterako, immunoeskasia dutenei, gizonekin sexu harreman «arriskutsuak» dituzten gizonei edo prostituzioan aritzen direnei.
