Joan den larunbatean emakume bati egindako sexu erasoa gaitzesteko elkarretaratzea egingo dute gaur Iurretan (Bizkaia). Iurretako Udalak, Anderebide Emakumeen Elkarteak eta Auskari Ijorretako Neska* Gazteek deituta, berretsiko dute ez dutela onartzen emakumeen aurkako inolako bortizkeriarik, eta babesa erakutsiko diote biktimari. Kontzentrazio isila egingo dute 19:00etan, Askondon.
Zabaldu duten oharrean, azpimarratu dute «emakumeenganako indarkeria, era guztietan (psikologikoa, ekonomikoa, fisikoa, sexuala, bikarioa…), duintasunaren eta segurtasun fisiko nahiz moralaren aurkako eraso larria» dela, eta, ondorioz, «giza eskubideen urraketa larri eta onartezina». «Herritarrei emakumeen aurkako indarkeriaren aurrean arduragabe ez jokatzeko eskatzen diegu; zero tolerantzia sexu jazarpen eta gehiegikeriaren aurrean», amaitu dute.
Erasoa egin zuen gizona asteburuan bertan atxilotu zuen Ertzaintzak, Eusko Jaurlaritzako Segurtasun Sailak jakinarazi duenez. Sexu askatasunaren kontrako delitu bat egitea leporatzen diote, eta epailearen esku geratuko da datozen orduetan.
