IUN-NEBk Ahal Dugu-rekin eta Batzarrerekin nahi du ituna

IRUÑEA. IUN-NEB Nafarroako Ezker Batua Ahal Dugu-rekin eta Batzarrerekin hitzartzearen alde agertu da. Marisa de Simon parlamentariak eta alderdiko 60 ordezkarik dokumentu batean proposatzen dute akordioak egitea hurrengo foru eta udal hauteskundeetan alderdi horiekin. Urriaren 23an, XI. batzarra da egitekoa Nafarroako Ezker Batua. Azken asteetan eztabaida prozesuan dago, eta testuinguru horretan 60 militantek Hitza betetzeko garaia, Errepublikaren bidean aurrera agiria aurkeztu dute. Agirian diote 2023ko foru eta udal hauteskundeei begira ezkerreko botoa bateratzea lortu behar dutela. Horregatik, apustu egin nahi dute ezkerreko indarren arteko lankidetza eta sinergien alde, ezkerreko eremua zabaltzeko.