AET Administrazioan Euskaraz taldeak egin du jakinarazpena: «Iruñeko Administrazioarekiko Auzien 1. Epaitegiak erabaki du Konstituzioaren plaza erdara hutsean jar daitekeela, 22/2023 epaiaren bidez». Euskararen kontrako «oldarraldi judizialarekin» lotu dute ebazpen judiziala, eta ekar ditzakeen beste antzeko erabaki batzuen gainean ere ohartarazi dute: «Ondorioak izan ditzake Iruñeko gainerako paisaia linguistikoan».
Ebazpena kritikatu dute, eta legerian horren kontra egiteko oinarriak badirela gogoratu. «Nafarroako Administrazio Auzitegiko osoko bilkurak, 2048/2022 ebazpenaren bidez, doktrina ezarri zuen gai hauetarako: Iruñeko Udalak ele bitan jarri behar ditu», azaldu dute. «Baina epaileek nahiago izan dute euskararen kontra jo, berriz ere».
