Iruñerriko Kontseilu Sozialistak eta Etxebizitza Sindikatu Sozialistak salatu dutenez, igandetik Iruñeko Jarauta kalean okupaturik zegoen eraikineko azken bi etxebizitzak hustu dituzte udaltzainek eta foruzainek. «Beraz, bost egun iraun duen sarbideen kontrol polizialaren ostean, igandean publiko egin genuen etxebizitza bloke sozialista erabat hustu dute».
Bi erakundeek plazaratutako agiriaren arabera, Iruñeko Udalak «behin-behineko etxebizitza alternatiba bat» eskaini dio han bizi zen familia bati, hura zuzenean etxegabetzea «arazo politiko» bilakatu zitekeelakoan udalarentzat. Gainerako bizilagunei, berriz, «kautelazko etxegabetzea» aplikatu diete, eta «kale gorrian» utzi: «Agerian geratu da Iruñeko Udalaren inpunitatea etxegabetzeak legez kanpo egiteko orduan».
Kontseilu Sozialistak eta Etxebizitza Sindikatuak iragarri dute «lanean» jarraituko dutela «udalaren erantzukizuna salatzen eta kalitatezko etxebizitza alternatiben alde». Bihar, ostirala, batzarra egingo dute Plazara Gune Komunitarioan, azken egunotan gertatutakoari buruzko informazioa emateko.
