Ipar Euskal Herriko Kontseilu Sozialistak ekintza bat egin du gaur goizean Dassault eta Lauak aeronautika enpresen seinalatzeko, Angelun (Lapurdi) eta Hazparnen (Lapurdi): «Enpresa horiek negozioa egiten dute gerlarekin». Hain zuzen ere, aeronautika eraikuntzako enpresak dira, eta sortzen dituzten piezetarik anitz gerrarako erabiltzen dira gero; Frantziak, adibidez.
Enpresa bakoitzaren aitzinaldean gorputz baten paperezko errepresentazioa utzi dute, eta tindu gorriz estali dute gero; baita enpresetako aitzinaldeak ere. Gerletan egunero hiltzen diren biktimei erreferentzia egin diete.
IEHKSren ustez, «berrarmatzea» behar gisa sustatzen dute estatuek, baina behar faltsua da: «Ustezko behar horrek gutti batzuen interes inperialistei baizik ez die mesede egiten. Langileontzat, gerlara eramaten gaituzten politikarien parean alternatiba iraultzailea osatzea da ezinbesteko beharra, esplotaziorik eta gerlarik gabeko jendarte baten alde».
Bide horretarik, maiatzaren lehenerako antolatu duten manifestazioan parte hartzeko deia egin dute berriz. Baionako herriko etxetik abiatuko da manifestaldia, 16:00etan, Gerla inperialistari ez! lelopean.
