Araba, Bizkai eta Gipuzkoako ikastetxe publikoetako irakasleen mobilizazioak hizpide, ohar bat atera du Interinok Taldea hezkuntzako sindikatuak. Eusko Jaurlaritzaren jarrera kritikatu du: sindikatuaren arabera, Hezkuntza Sailaren «azken mugimenduak» ez dira lagungarriak izan elkarrizketarako, eta urratsak falta dira langileen ordezkariekin negoziazio eraginkor bat izateko. Horiek horrela, maiatzaren 12tik 16ra egitekoa den greba deialdiarekin bat egingo duela jakinarazi du.
LAB, Steilas, ELA eta CCOO sindikatuek batera egina da deialdi hori, eta ikasturte honetan beste hainbat ere egin izan dituzte elkarrekin. Dagoeneko bederatzi greba egun egin dituzte aurten Arabako, Bizkaiko eta Gipuzkoako hezkuntza publikoko irakasleek. Interinok Taldeak sindikatu horien jarrera kritikatu du, eta zera egotzi die: Interinok sindikatuaren izena mobilizazioetako pankarta eta komunikatuetan jarri ez izana, Interinok Taldeak horietan parte hartu duen arren. Harridura eta kezka, biak azaldu ditu horregatik, eta aldaketa nahi dutela adierazi du: «Batasun sindikala behar bat baino gehiago baita: betebehar morala eta estrategikoa».
