Bukatu da Donostiako Aste Nagusia, eta oso ona izan da udalaren aurtengo balantzea. Juan Karlos Izagirre alkateak azpimarratu du inoizko festa parte hartzaile, euskaldun eta herrikoienak izan direla. Festa, aurreratu zuten moduan, hiri guztira zabaldu da aurten, eta alkateak gune berrien egonkortzea aipatu du. Gainera, esan du herritar aktiboak nahi dituztela eta hori lortu ahal izan dutela, bai udalak eta bai herri mugimenduek antolatutako ekintzekin; herritarren erantzuna paregabea izan da.
Eguraldiak asko lagundu ez duen arren, astearte gaueko enbatari aurre egiteko antolatzaileek zein herritarrek eman zuten erantzuna goraipatu du Izagirrek, eta herritarrak zoriondu ditu euria egin arren festara irteteagatik. Esan du haiei esker kalea bizi-bizirik eta kolorez beteta egon dela aste osoan.
Nerea Txapartegi Kultura eta Euskara arduradunak, berriz, azaldu du udalaren egitarauko 383 jarduerek harrera ona izan dutela eta suak izan direla beste urte batez jendetsuenak. Hala ere, jarduera txikiagoen garrantzia ere azpimarratu du, eta horien artean arrakastatsuenak aipatu ditu: zezensuzkoa, Sagueseko kontzertuak, Zurriola Kultura Irekia, goitibeherak, Kursaaleko gazteen gunea...
Donostiako Aste Nagusiko berri txarra lehen gauean gertatu zen sexu erasoa izan da. Ekintza gaitzetsi ondoren, alkateak eman zitzaion erantzun sozial ona aipatu du, eta eskatu du horrelako ekintzak errepika ez daitezela ez jaietan eta ez eguneroko bizimoduan.
