145.500 litro oliba olio, 30.700 produktu sorta (kontserbak) eta 10.700 eskaera. Errigorak inoiz baino jaki gehiago banatuko ditu aurtengo Eskutik Eskura kanpainan. Aste Santuaren ondoren banatuko dituzte, maiatzaren bukaerara arte.
Martxoaren 10etik 26ra egin zuten kanpaina. Igoera nabarmena izan da: iaz baino 17.530 litro oliba olio birjina estra gehiago, 4.655 produktu sorta gehiago eta 974 eskaera gehiago.
Nafarroa hegoaldean oinarritutako proiektua da Errigora. Bertako produktuak Euskal Herrian banatzen ditu, elikadura burujabetza babesten du, eta ekarpena egiten dio Nafarroako hegoaldeko euskalgintzari, euskara ofiziala ez den eremu batean.
Ikusi gehiago
Aurtengo kanpaina «jauzi berri bat» izan dela esan dute Errigoraren bultzatzaileek, «kontsumitzaile arduratsu gehiagok proiektura batzeko asmoa erakutsi dutelako». Uste dute emaitza horiek erakusten dutela Errigoraren komunitatea zabaltzen ari dela urtetik urtera.
Eredua, indartsuago
Kanpainaren emaitzei esker, aurrera begira indartzen jarraituko dute proiektuarekin bultzatu nahi duten eredua: «Bitartekari espekulatzailerik gabekoa» eta ekoizleen eta kontsumitzaileen premietan oinarritutakoa. «Bide horretan», azaldu dute, «kontsumitzaileok ekoizpenean eragiteko gaitasun handiagoa biltzen jarraituko dugu, eta, era berean, Nafarroa erdi eta hegoaldeko ekoizpena indartu eta babestuko dugu».
Errigoraren arduradunek gogoratu dute, ordea, haien lana eta «beste modu batera» kontsumitzeko eta ekoizteko bidea ez dela amaitzen Eskutik Eskura kanpainarekin. Urte osoan lan egiten dute alternatiba horren alde: ekoizpenean eraginez, euskara sustatuz, sarea indartuz, ondoko kanpainak prestatuz, jantoki kolektiboekin lan eginez, luzera begirako erronkak identifikatuz... Hori guztia, hiru helburu lortzeko: elikadura burujabetza, euskara eta auzolana.
