Bizkaiko Auzitegiak hamalau urteko espetxe zigorra ezarri zion gizon bati, iloba adingabeari sexu erasoa egitea egotzita. Akusatuaren legezko ordezkaritzak helegitea aurkeztu zuen epaiaren kontra, eta EAEko Auzitegi Nagusiak hori onartzea erabaki du. Argudiatu duenez, auziaren instrukzioan defentsa eskubidea urratu zioten gizonari.
Helegitearen arabera, epaia adingabe baten lekukotzan oinarritu zen. Deklarazio hori «aurretik eratutako froga gisa» erreproduzitu zuten epaiketan. Akusatuaren defentsaren iritziz, deklarazio horrek «ez zituen beharrezko legezko bermeak» betetzen, eta ez zuen defentsarako eskubidea bermatzen, ikertutako pertsonari ez ziotelako «behar bezalako zitaziorik» egin bertaratzeko. Bestalde, helegitean adierazi zuten ofiziozko abokatuak aurreko egunean izan zuela gaiaren berri, eta ez zuela denborarik izan «aldez aurretik eratutako frogan bere esku hartzea prestatzeko eta bezeroarekin harremanetan jartzeko».
Bizkaiko Auzitegiak orduan esan zuenez, legez eska zitezkeen berme guztiekin egin zuten aldez aurretik eratutako froga. Auzitegi Nagusiaren arabera, ordea, froga horren zilegitasuna argudiatzeko emandako arrazoiek ez dute betetzen «kontraesan printzipioak eta defentsa eskubideak ezarritako eskakizun multzoa».
Epaia ez da irmoa. Helegitea aurkez daiteke Espainiako Auzitegi Gorenean.
