Espainiako Unibertsitateetako Errektoreen Konferentziaren errektoretza batzordeak bilkura izan zuen atzo, eta testu bat onetsi zuten han Palestinako gatazkaren inguruan; testu horretan adierazi zuten prest zeudela Israelgo erakundeekin dituzten harremanak eteteko baldin eta ez badute «konpromiso irmorik» azaldu bakearen alde eta giza eskubideen nazioarteko defentsan. Kanpaldiak egin dituzte unibertsitatetan Israelen jarrera gaitzesteko, eta, kanpaldi horietan parte hartu duten beste hainbat talderekin mintzatu ostean, agiri bat zabaldu zuten iluntzean Ikasle Abertzaleek: salatu nahi izan zuten Espainiako Unibertsitateetako Konferentziak Palestinaren inguruan esandakoak «hitz hutsak» direla. Errektoretzei eskatu zieten harremanak «berehalakoan» eteteko Israelekin.
«Uste dugu komunikatu horrek ez diela erantzuten gure aldarrikapenei, errektoretzen zuriketarako baino ez duela balio, alegia», esan dute IAko ordezkariek agirian. «Alde horretatik, ez dugu nahi errektoreek beren kontratuak berrikustea, era guztietako harremanen haustura baizik». Israelgo unibertsitateekin sinatutako hitzarmenak gaitzesteaz gain, adierazi dute unibertsitateek erlazioa dutela palestinarren aurkako «genozidioa» finantzatzen duten enpresekin, eta harreman horiek eten egin behar direla.
Gainera, errektoreei egotzi diete estatu sionistak ezarritako «marko diskurtsiboa» erabiltzea. EHUri eta Nafarroako Unibertsitate Publikoari propio eskatu diete negoziazio mahai bat abiatzeko ikasleen eskabideen inguruan.
