Eusko Jaurlaritzako Kultura eta Hizkuntza Politikako Sailak gaurko Gobernu Kontseiluan aurkeztu du Elebide hizkuntza eskubideak bermatzeko zerbitzuaren 2019ko memoria. Horren arabera, hizkuntza eskubideen inguruko 194 intzidentzia erregistratu ziren iaz, 2018an baino 51 gutxiago.
2007an sortu zen Elebide, herritarrei hizkuntza eskubideak bermatzen laguntzeko, eta, horretarako, informazioa eta aholkularitza eskaintzen du. Hala ere, kexak bakarrik ez: eskariak, kontsultak eta iradokizunak ere jasotzen ditu. Zerbitzua sortu zenetik bildutako kopururik txikienak dira iazkoak, eta jaitsiera, gainera, nabarmena izan da aurreko urteen aldean.
2019an aurkeztu ziren 194 intzidentzietatik hamasei ez ziren onartu. Hau da, aztertu egin ziren, baina, kexaren zioa sakon ikertu ondoren, Elebidek ondorioztatu zuen ez zegoela oinarri juridikorik intzidentzia tramitatzeko edo Elebideren eskumenetik kanpo geratzen zela intzidentzia. Tramitatutakoen %94 (168) kexak izan ziren, eta, horietatik 164 kasutan (%98), euskal hiztunek jasan zuten eskubide urraketa. Horrez gain, zortzi kontsulta eta bi iradokizun tramitatu ziren.
Aurreko urteetan bezala, eremu publikoan pilatu dira kexa gehienak (%87). Horietatik %57 Euskal Autonomia Erkidegoko administrazio orokorrari zegozkion —Eusko Jaurlaritza eta EAEko sektore publikoa: Osakidetza, Euskal Herriko Unibertsitatea, Lanbide…—; 2018arekin konparatuta, 24 kexa gehiago. Foru aldundien kontra aurkeztutako intzidentzia kopuruak, ordea, behera egin du. Jaitsiera Bizkaiko Foru Aldundian gauzatu da: 2018an 11 kexa izan ziren, eta 2019an, berriz, hiru.
