EHU Euskal Herriko Unibertsitateak gaur egin du jakinarazpena: unibertsitatearen Hitz katedrara batu dira Elhuyar, Ikerlan eta MasOrange. Propio adimen artifizialaren eta hizkuntzaren teknologiaren arloan dihardu katedrak. Aitor Soroa zuzendariak nabarmendu du «programa anbiziotsua» dutela sektorean lidergoa sendotzeko eta «abangoardia teknologikoan» kokatzeko. Orain, atxiki diren entitateen bidez, indartuta jardun ahal izango dute egiteko horretan.
Izan ere, katedraren helburu nagusia teknologia horren «inpaktu positiboa» indartzea da, eta hainbat arlotan jada erabiltzen duten prestakuntza eskaintza aberastea. Sektore publikoaren eta pribatuaren arteko lankidetza sustatu nahi dute egiteko horretan.
Ikerlaneko Teknologia Digitalen eta Adimen Artifizialaren arloko zuzendari Josu Bilbaok aurreratu du katedraren bidez era izango dutela «gizarteari helarazteko» arloan duten ezagutza. Orain NLP zentroak lengoaia naturalaren prozesamenduetan ardazten du bere jarduna: Elhuyarrek sustatutako zentro bat da, eta bertako koordinatzaile Aitzol Astigarraga Pagoagak adierazi du katedraren «parte» izatea «oso garrantzitsua» dela: «Hizkuntzaren teknologien gainean ikertzen jarraitzeko eta soluzioak merkatuko beharretara egokitzeko». MasOrange enpresako Talentuaren zuzendari Elisa Peranek, berriz, nabarmendu du katedraren bidez «ikasleek zuzenean» lan egiteko era izango dutela.
