Bart, gauerdi aldera, sute bat piztu da Muskizen (Bizkaia), Acacias kaleko etxebizitza batean, eta hiru pertsona zauritu dira bertan. Bizkaiko suhiltzaileek X sare sozialean adierazi dutenez, erre den etxebizitzaren jabea dago larrien: Gurutzetako ospitalera eraman dute, erredurengatik eta keak eragindako intoxikazioagatik.
Larrialdi zerbitzuek abisua jaso ostean, Ertzaintza eta osasun zerbitzuak ere bertaratu dira, suhiltzaileekin batera. Han, etxebizitzaren jabea eta haren txakurra erreskatatu dituzte, eta tokian bertan artatu. Beste bi lagun ere lehen sorotsi behar izan dituzte, kea arnasteagatik, baina ez dituzte erietxeratu.
01:00 aldera itzali dute sutea baina, suhiltzaileek adierazi dutenez, garrek kalte material handiak eragin dituzte etxebizitzan.
