Hilda aurkitu dute Baztango (Nafarroa) Saioa mendian galdu zen Hondarribiko (Gipuzkoa) mendizalea. Atzotik desagertuta zegoen 59 urteko gizona. Nafarroako larrialdi zerbitzuetako langileak bilaketa lanetan aritu dira, eta gaur goizean topatu dute gorpua, 10:30 aldera, Foruzaingoak baieztatu duenez. Saioako mendi tontorretik gertu topatu dute —Saioa mendia Baztango mendi altuena da; 1.418 metro ditu—.
Mendizalea atzo goizean goiz abiatu zen Hondarribitik Baztanera, eta 11:00etan abiatu zen mendian gora, Venta Quemadatik (Belate mendateko sarreretako bat da); ordutik, ez zuten haren berri izan. Nafarroako larrialdi zerbitzuek abisua jaso zuten 18:30ean, eta orduan hasi zituzten bilaketa lanak; ondoren, inguruko herrietako suhiltzaileak, basozainak, poliziak eta boluntarioak batu zitzaizkien. 20:22an mendizalearen autoa topatu zuten Venta Quemadan, eta, 23:35ean, haren mugikorra.
Auzitegi Medikuntzako Nafarroako Institutuan dago gorpua, eta han egingo diote autopsia. Foruzaingoa heriotzaren zergatia ikertzen ari da.
