Begoña Pedrosa Eusko Jaurlaritzako Hezkuntza sailburuak bilera batera deitu ditu Steilas, LAB, ELA eta CCOO sindikatuak, biharko. Araba, Bizkai eta Gipuzkoako hezkuntza publikoko irakasleek atzo amaitu zuten bost eguneko lanuztea, eta, bertan, sindikatuek Eusko Jaurlaritzari eskatu zioten «benetako negoziazio bat» abia dezala. Bederatzigarren greba eguna amaitu eta biharamunera, dei egin die Pedrosak, eta Jaurlaritzak «akordio bat lortzeko nahia» duela azpimarratu du, ohar bidez.
Apirila «aukeretarako hilabetea» izatea nahi du Pedrosak; beraz, «elkarrizketa eraikitzaileak» egin beharraz mintzatu da. Hala ere, sailburuak gaineratu du aurrera egin behar dutela «lasaitasunez», eta nabarmendu «euskal hezkuntza sistemaren benetako beharrei heltzea» izan behar duela elkarrizketen helburu nagusiak. Horiek horrela, «garapen akademikoa eta ikasleen ongizate emozionala erdigunean jarri» beharko dutela azpimarratu du.
Irakasleek bederatzi greba egun egin ostean luzatu die eskua Hezkuntza Sailak sindikatuei. Tentsioa handia den honetan, sindikatuek ohartarazi dute «indartsu» daudela grebari berriz ekiteko Hezkuntza Sailak aldarrikapenei erantzun ezean, eta irakasleak sindikatuen jarrerarekin bat datozela dirudi: sindikatuen arabera, lau irakasletik hiruk bat egin dute greba deialdiekin.
Martxo amaieran bildu ziren bi aldeak azkenengoz, eta negoziazioak goizaldeko ordu txikiak arte luzatu zituzten, baina ez zen akordiorik egin. Bileraren ostean, sindikatuek kritikatu zuten Hezkuntza Sailak ez zuela zehaztu nola arinduko dituzten irakasleen lan zamak, eta neurri horiek noiz eta nola jarriko dituzten martxan. Hain zuzen ere, horixe eskatzen dute sindikatuek, «bermeak». Jaurlaritzak, ordea, greba deialdiak bertan behera utzi ez izanari egotzi dio negoziazioetan aurrera egin ez izana: «Eragotzi egiten du negoziazio mahaiari berriro ekitea eta gure hezkuntza sistema hobetuko duen akordio bat lortzeko aurrera egitea».
Asteotan sindikatuek googorarazi dute hamabost urte daramatzatela lan ituna berritu gabe, eta ezin dutela horrela jarraitu. Hauek dira eskari nagusiak: lan zamak arintzea, lantaldeak gazteberritzeko plan egoki bat ezartzea, enplegu publikoa egonkortzea, erosahalmena berreskuratzea, eta martxan jartzea lan osasuna sustatzeko eta euskara eta hezkidetza bermatzeko neurriak.
