'Herriko tabernen' alde, abuztuaren 8an

Abuztuaren 8rako herriko tabernen aurkako auzia salatzeko mobilizaziora deitu dute Donostian —17:30ean, Gipuzkoa plazatik—. Kulturari eta politikari aterik ez itxi, herriko tabernak libre eta zabalik izango da leloa. Auziaren aurkako adierazpen bat plazaratu dute, eta 800 eragilek baino gehiagok egin dute bat; EH Bilduk, LABek eta ELAk, besteak beste. Donostiako Udalak adierazpen instituzionala egin dezan mozioa aurkeztu dutela jakinarazi dute Kattalin Miner mugimendu feministako kideak eta Agus Rodriguez 35/02 sumarioan zigortutako herritar taldeko ordezkariak. Gogoratu dute duela hamahiru urte baino gehiago hasi zela auzia, eta salatu Euskal Herriko 101 lokal konfiskatzeaz gain «jardun politikoa egiteagatik» epaitu dituztela.