Hego Euskal Herriko biztanleen erdiek jada hartua dute txertoren bat

Bihurgunez eta goranzko maldaz betetako bideak lauagoa dirudi azkenaldian. Izan ere, COVID-19aren kontrako txertaketak Euskal Herrian hartu duen abiadak nabarmen argitu du izurri iluna. Hego Euskal Herriko datuak dira eskuragai, eta, horien arabera, guztira 1.436.559 pertsonak hartu dute birusaren kontrako txertoa; dosi bat, behintzat. Hain zuzen, kopuru horretara iritsita, mugarri esanguratsu bat lortu da Hegoaldean: biztanleen %50ek hartu dute txertoaren bidezko babesa. Pauta osoa jaso dutenen zenbatekoa ere nabarmen ari da hazten: 944.136 dira, herritarren %33.

Kanpainak aitzina egin ahala, gero eta hurbilago da, ustez, birusaren kontrako talde immunitatea. Adituen arabera, herritarren %70ek txertoren bat hartutakoan erdiets liteke, eta, hori hala balitz, egungo erritmoari eutsita, Hegoaldean abuztuaren 9an lor liteke. Hain zuzen, agintari ugarik egutegiari lotuak dituzte begiak, eta egin dituzte haren gaineko aurreikuspenak: Nafarroako Gobernuko lehendakari Maria Txibitek adierazi du herrialdean «abuztuaren hasieran» lortuko dela mugara iristea. Halaber, esan du 50 urtetik gorako herritarren %96k hartua dutela dosiren bat.

Kutsatzeei buruzko datuei dagokienez, Osakidetzak eta Osasunbideak guztira 9.141 proba egin zituzten herenegun gaitza detektatzeko, eta horien %2,6k eman zuten positibo: 236 kutsatu izan ziren. Ia erdiak Bizkaian zenbatu zituzten: 115 kasu atzeman ziren lurralde horretan. Halaber, Nafarroan 46 kasu izan ziren; Gipuzkoan, 38; eta Araban, berriz, 28.

Bestalde, birusaren intzidentzia tasa metatuek erakusten dute pandemiaren bilakaerak onbidean segitzen duela: gaur egun, Hego Euskal Herriko lau lurraldeen tasak 150etik beherakoak dira. Zehazki, Bizkaian 100.000 biztanleko 145 laguni atzeman diete COVID-19a azken hamalau egunetan; Araban, 129ri; Gipuzkoan, 127ri. Hegoaldean, Nafarroak du tasarik apalena: 108.

Ospitaleei so, Hegoaldeko osasun agintariek atzo jakinarazi zutenez, asteazkenean 11 lagun erietxeratu zituzten gaitzarengatik; horietako bat Nafarroan ospitaleratu zuten, eta, foru gobernuak zehaztu duenez, ZIUra sartu zuten zuzenean. Erietxeratze horiek aintzat harturik, guztira 152 lagun daude Hegoaldeko ospitaleetan. ZIU zainketa intentsiboetako unitateetan 62 dira, larri.