Eusko Jaurlaritzarako hautagai nagusiak bilduko ditu gaur Hamaika Telebistak Bilboko Euskalduna Jauregian egingo duten hauteskunde eztabaidan. Hauteskunde kanpaina betean, alderdi nagusietako hautagaien arteko eztabaida egingo dute.
Eztabaidan parte hartuko dute Eugenia Arrizabalaga EAJko Gipuzkoako hautagaiak, EH Bilduko Gipuzkoako hautagai Nerea Kortajarenak,, Iñigo Martinez Elkarrekin Podemoseko Bizkaiko hautagaiak, Eneko Andueza Gipuzkoako PSE-EEko hautagaiak, Laura Garrido PP eta Ciudadanosen koalizioko Arabako hautagaiak eta Jose Ramon Becerra Equoko zerrendaburuak.
Hauteskunde gauaren berri ere zuzenean emango du Hamaika Telebistak, igandean. Hala, Bilboko estudioetatik zuzenean ariko dira igandean 19:30etatik aitzinera. Datuak, zuzeneko grafikoak eta alderdien erreakzioak jasoko dituzte. Unitate mugikorren bidez lehen balorazio politikoak jasotzeko elkarrizketak egingo dituzte, eta analisirako tartea zabalduko dute Euskal Herriko eta kanpoko hedabideetako kazetariekin.
Bi saioak BERRIAn ikusi ahal izango dira. LTD, Chromecast eta Hamaika.eus-en bidez ere ikusten ahalko dira.
