Hamabost milioi euroren zuzenketak onartu dituzte Nafarroan, aurrekontuen tramitazioan

Eskuineko oposizioak aurkeztutako zuzenketa guztiak atzera bota, eta bere gehiengoa baliatu dute PSNk, EH Bilduk, Geroa Baik eta Zurekin Nafarroak aste honetan. Lau egun iraun du guztira. Nafarroako Parlamentuko Ekonomia eta Ogasun Batzordean hasi ziren departamentukako zuzenketak eztabaidatzen, eta gaur arratsaldean amaitu dute. Orotara, hirurehun zuzenketa inguru onartu dira, eta 15,5 milioi euro inguru finantzatuko dituzte.

Behin tramite hori osatuta, abenduaren 19ko osoko bilkuran onartuko dituzte 2025eko aurrekontuak. Hala, Nafarroako Gobernuak 6.431 milioi euroko aurrekontua izango du datorren urtean, inoizko handiena. Behin Nafarroako Gobernuak EH Bildurekin aurrekontuei bide emateko akordioa lortuta, tramite luze bat izan da aste honetako eztabaida, baina prozesu horretan aurrekontua ez da handitu.

Onartutako zuzenketa gehienak ezbeharrei eta ustekabeko gertaerei aurre egiteko 27 milioi euroko diru sailetik finantzatuko dira. Falta den gainerakoa departamentuen aurrekontuetatik aterako da, gobernuak aurrez proposatutako diru sail batzuk ordezkatuta.

Diru kopuruari dagokionez, onartutako zuzenketen erdiak baino gehiago —zortzi milioi euro—, Nafarroako hainbat udaletako azpiegituretan inbertsioak egiteko baliatuko dira. Hirigintza arloa alde batera utzita ere, zuzenketa horietan diru sail ugari daude udalen zerbitzuak eta baliabideak indartzeko: batik bat kultur proiektuen ingurukoak, eta haur eskolak eta ikastetxe publikoak hobetzeko.

Beste onuradun nagusiak osasungintzan, gizarte arloan, berdintasunean, kulturgintzan eta euskaran aritzen diren elkarteak izango dira. Besteak beste, Gizarte Eskubideen Departamenturako 4,7 milioi jarriko dira, eta horietako gehienak gizarte elkarteentzako laguntzak izango dira. Onartutako ekarpen horietan, Kultura Departamentuak 3,2 milioi euro banatuko ditu; Hezkuntzak 1,7 milioi euro; Osasunak 1,1 milioi euro, eta Landa Garapenak 626.000 euro. Memoria eta Bizikidetzako, Kanpo Ekintzako eta Euskarako Departamentuak, berriz, beste 267.000 euro banatuko ditu. 

Oposizioaren 871 zuzenketa

UPNk, PPk eta Voxek osoko zuzenketak aurkeztu zizkioten aurrekontuen lege proiektuari, baina gainerako alderdiek atzera bota zituzten azaroaren 21ean. Alta, haren edukia aldatzen saiatuko dira zuzenketa partzialen bidez, eta proposamen horietan euren lehentasunak zehaztu dituzte. Alferrik. Orotara 871 zuzenketa aurkeztu dituzte. UPNk 52 milioi euroren ekarpenak proposatu zituen, eta PPk 46 milioirenak. Nafarroako Gobernua osatzen duten hiru bazkideek eta EH Bilduk atzera bota dituzte guztiak.

Eskuineko eta eskuin muturreko alderdiek salatu dute ez zaiela jaramonik egin. Eztabaida hasi aurretik, PSNko Ramon Alzorrizek ohartarazi zuen teknikoki eta politikoki ez zela bideragarria proposamen horiek onartzea. «Eskuineko politiken antitesia gara, baina ezin gara ibili aurrekontuak desorekatzen, zertarako-eta zuzenketa batzuk onartzeko aurrekontuak babestuko ez dituzten alderdi batzuei».

Javier Esparzak sozialistei leporatu die EH Bildurekin akordioa egin izana, eta salatu du PSNkoek nahiago dutela UPNren edozein proposamen «zakarretara bota, edukia irakurri ere egin gabe». Haren irudiko, aurrekontuak ez dira «ez sozialak, ez eta aurrerakoiak ere». Gaurko eztabaidan, PSNri eta Geroa Bairi leporatu die elkarbizitzan eta memorian kontzientzia zuritzea. 

Geroa Baiko Mikel Asianek gogora ekarri du 52 milioi euroren ekarpenak proposatuta «ezinezkoa» dela horiek onartzea. «Haiek ere badakite».

EH Bilduko Laura Aznalek adierazi du, behin zuzenketa horiek onartuta, aurrekontuak «hobetu» egingo direla, «herritarren eskubideei erantzunez eta zerbitzu publikoen beharrak zabalduz». Bide beretik, Daniel Lopez Zurekin Nafarroako parlamentariak nabarmendu du lehentasunezko kontuen finantzaketa sendotu egin dela. «Gure lehentasunak argi daude. Zerbitzu publikoak, gizarte politikak, berdintasuna eta lurralde kohesioa hobetzea».