Bilboko Guggenheim museoak 10:00etan zabaldu behar zituen ateak, baina minutu batzuk lehenago «objektu susmagarri bat» aurkitu dute, eta beharrean zeuden museoko langileak kanporatu, sartzeko zain zeuden turistak urrundu, eta itxita eduki dute eraikina.
Ertzaintza joan da lekura, objektua aztertzeko, eta, badaezpada, Mazarredo eta Abandoibarra kaleak itxi dituzte. Tranbia zerbitzua ere eten dute inguru horretan. Paketean lehergailurik ez zegoela baieztatu ostean, operatiboa bertan behera utzi dute, eta museoa zabaldu dute berriro, ohi baino bi ordu eta erdi geroago.
