Guardia Zibilak bi lagun atxilotu ditu, ETAren biktimak umiliatu dituztelakoan. Atxilotuetako bat Bilbon atzeman dute, eta Legution (Araba) bestea. Azken herri horretan ETAk hil zuen Juan Manuel Piñuel guardia zibilaren omenezko oroigarri bat suntsitzea leporatu diete. 2017ko otsailetik Piñuelen omenezko oroigarria "sistematikoki suntsitu" dutela uste du Guardia Zibilak.
ETAk Guardia Zibilaren Legutioko kuartelaren ondoan jarri zuen bonba-auto batek hil zuen Piñuel, 2008ko maiatzaren 14an. Bonbak kuartela suntsitu zuen, eta ez da besterik eraiki. Kuartela zegoen tokian jarri dituzte Piñuelen omenezko oroigarriak.
Polizia operazioa Guardia Zibilaren Informazio Zerbitzuak egin du, Espainiako Auzitegi Nazionaleko 3. Instrukzio Epaitegi Nagusiak koordinatuta.
