Greneten aurkako salaketa jarri du CRAC batzordeak

CRAC Errotik Zezenketen Aurka Dagoen Batzordeak salaketa jarri du Jean Grenet Baionako auzapezaren aurka. Berehalako auzi prozedura izanki, gaur edo beranduenik bihar goizean aztertuko du Baionako auzitegiak salaketa.

Zezen plazaren inguruan manifestatzea eta hiri guztian gaindi eskuorriak banatzea debekatu dio Grenetek CRAC batzordeari. «Modu ezberdinetako komunikazioa debekatuz, diktadorearena egiten ari da Grenet», dio haserre Jean-Pierre Garrigues batzordeko presidenteak. Auzapezak harturiko erabakia uztailaren 23koa baldin bada ere, agorrilaren 2an ukan zuten debekuaren berri. «Horretarako dugu ere berehalako auzi prozedura hautatu. Azken momentuan jakin dugu. Ez zigun eman nahi erabakiaren berri», azaldu du Garriguesek.

Hala eta guztiz ere, manifestazioa egingo dute ostiralean 14:30ean. Herriko etxe aitzinean elkartuko dira, eta, bertatik abiaturik, hirian gaindi ibiliko dira. Protesta zezen plazaren aitzinean bukatzeko gogoarekin baldin badira ere, oraingoz debekatua zaie.

«Ahalkearen zorionak»

«Berriz ere, zezenketen ezeztapena exijituko dugu». Mezu hori dute bihar ere entzunaraziko, Baionako zezen plazaren 120 urteak eta Frantziako lehen zezenketaren 160 urteak ospatzeko ekitaldiaren kari. «Grenetek besta eginen du mundu guztiko toreatzaileez inguraturik, zezenketakospatzeko... Baina ahalkearen zorionak dituzte ospatuko!», Darriguesen hitzetan. Zezenketak ospatu arren, bihar ez da zezenketarik egingo Baionan. Hori jakinda, Greneten debekua «are onartezinagoa» dela dio CRACeko presidenteak. Zortzi egunez zaie manifestatzea debekatua. «Espero dugu auzitegiak guri arrazoi ematea eta zezen plaza aitzinera joan ahal izatea eskuorriak banatzera».

CRAC batzordea ez da Grenetek jarri debekua gehiegizkoa dela ikusi duen bakarra. Patrick Dallennes Baionako suprefetak ere DLPAJ Afera Juridiko eta Askatasun Publikoei buruzko Frantziako Barne Ministerioko Zuzendaritzari helarazi zion erabakia. Egitura horrek ere eskatu zuen agorrilaren 2an erabakia moldatzeko. Ez du, ordea, ezer aldatu auzapezak. «Grenetek ez gaitu entzuten, eta ez du ere ez estatua entzuten, berean segitzen du», dio Garriguesek, harriturik. Suprefetak ere salaketa jartzea espero du CRAC batzordeak.

Zezenketazale handia da Baionako Herriko Etxea, eta urteak daramatzate CRACeko militanteek horren aurka borrokan. Hiriko besten kari zein urte guztian, maiz antolatzen dituzte zezenketen bukaera galdetzeko ekintzak. Lehen aldia dute, haatik, auzitegira jotzen dutela.

Donostian ez dute zezenketarik eginen Aste Nagusian. Urteotan hildako zezenak gogoan, elkarretaratzea dute etzi eguerdian.