Gorka Torrek ez ditu ordainduko eman dizkioten isunak

Nafarroa Behereko EHE Euskal Herrian Euskaraz taldeak iragarri du Gorka Torre Rocak ez dituela ordainduko Baionako Auzitegiak ezarri dizkion isunak. Bi aldiz epaitu eta zigortu dute aurten, euskaldunen hizkuntza eskubideen urraketa salatzeko ekintzak egitea leporatuta. Intsumisiorako deia eginez, dirua biltzeko kanpaina bat abiatuko dutela iragarri du EHEk, gastu judizialak ordaintzeko, eta euskararen aldeko kanpainak antolatzeko; zehazki, «euskara zapaldua den toki orotan ‘Euskaraz lehentasunez’, ‘Geldi euskara zapaltzea’ eta ‘Justizia euskararentzat’ idazteko tindua erosteko».

Martxoan izan zuen lehen epaiketa Torre Rocak, 2023ko irailean Herribiltzak euskararen alde egindako margoketa batzuengatik. Hilabeteko presondegi zigorra eman zioten, gibelapenarekin, eta bostehun euroko isuna ordaintzera zigortu zuten. Dei egin zion auziari. Irailean berriz epaitu zuten, Baionako suprefeturan margoketa egin eta frantses hutsean idatzitako hainbat bide seinale kentzea leporatuta. 3.268 euroko isuna eman zioten denera.

Bere kontrako bi epaiketetan euskaraz deklaratzeko eskubidea eskatu zuen Torre Rocak, baina epaileak uko egin zion; auzi gelatik atera, eta epaiketan ez parte hartzea erabaki zuen auzipetuak.

EHEk, bidalitako oharrean, goraipatu du belaunaldi ezberdinetako euskaltzaleak elkartu zirela euskararentzat justizia eskatu eta Torre Rocari elkartasuna adierazteko: «Ikasleei baxoa euskaraz pasatzea debekatzen zaiela salatu genuen, eta Frantziako legedia euskararen zapaltzailea dela erakutsi genuen».

Ondoko asteetan elkartasun kanpaina bat abiatuko dute, dirua bildu eta «euskararen zapalkuntzaren aurrean intsumisioa garatzeko». Euskararen zapalkuntzari intsumisioa lelopean, hitzaldiak eginen dituzte, eta tokian tokiko euskaltzaleek elkartasun ekitaldiak antolatuko dituzte.