Eusko Jaurlaritzako Segurtasun Sailak jakinarazi duenez, 57 urteko gizonezko baten gorpua aurkitu zuten herenegun Gasteizen. Zehazki, Gamarra auzoko lursail batean topatu zuten, goi tentsioko argindar dorre baten alboan. Ertzaintza zer gertatu den ikertzen ari da, baina hipotesi nagusietako bat da gizona elektrokutatuta hil zela, zeuzkan erredurak deskarga elektriko baten ondorio izan baitaitezke.
Lursailaren jabeak aurkitu zuen gizonezkoaren gorpua, eta larrialdi zerbitzuei abisatu. Hala, 17:30 aldera bertaratu ziren Ertzaintza eta osasun zerbitzuak. Azaldu dutenez, heriotza baieztatu besterik ezin izan zuten egin, eta Gasteizko Auzitegi Medikuntzako Institutura eraman zuten gorpua, autopsia egiteko. El Correo egunkariak argitaratu duenez, Ertzaintzak uste du duela aste pare bat hil zela gizona. Ez zegoen hura desagertu zelako salaketarik.
