Gizonezko bat atxilotu dute Nafarroan, 5 urteko bilobari ukituak egiteagatik, Nafarroako Probintzia Auzitegiak jakinarazi duenez. Epaiak frogatutzat jo du salatutakoa. Tuteran gertatu ziren, iazko urtarrilaren eta ekainaren artean.
Adingabe bati egindako sexu eraso jarraituengatik zigortu dute gizonezkoa. Zigortua 72 urteko gizonezko bat da, eta epaileak bost urteko espetxealdira kondenatu du. Halere, fiskaltzak eta defentsak akordio bat egin dute, eta ez da espetxean sartuko, baina Espainiako Estatutik kanporatua izango da zigorrak ezarritako denboran: bost urtez. Gizona beste estatu bateko herritarra da. Espainian lehenago sartuko balitz, kartzela zigorra berrezarri ahal izango dio auzitegiak.
Efe agentziak auzitegiko iturriak aipatuz azaldu duenez, kondenatua bilobarekin bizi zen, haren anaiarekin eta gurasoekin batera. Biktimarekin etxean bakarrik gelditzen zen uneak baliatzen zituen erasoak egiteko.
Salaketaren ondotik, gizonezkoa atxilotu zuten iazko ekainean, eta behin-behinean espetxeratu zuten hiru astez.
