Gizonezko bat hil da Arroitzen (Nafarroa), traktore istripu batean. Gaur arratsaldean gertatu da ezbeharra. Nafarroako Gobernuak jakinarazi duenez, traktorea irauli egin da, eta 52 urteko gizonezkoa harrapatuta geratu da.
SOS Nafarroako larrialdi zentroak abisua jaso du 14:35ean, eta Lizarrako suhiltzaileak, foruzainak eta mediku talde bat bertaratu dira. Iritsi direnerako, baina, gizonezkoa hilik zegoen. Gorpua Nafarroako Auzitegi Medikuntza Institutura eraman dute, eta han egingo diote autopsia. Bien bitartean, Foruzaingoa gertaera ikertzen ari da.
