22 urteko gizonezko bat atxilotu eta espetxean sartu dute, Bilbon emakume bati kuter batekin eraso egin izana leporatuta. Erasoa urtarrilaren 9an gertatu zen, Bilboko etxebizitza batean. Ertzaintzari jakinarazi zioten gizonezko batek eraso egin ziola emakume bati, eta zenbait kalte eragin zituela etxebizitzan. Poliziak hara joan zirenean emakumea aurkitu zuten, besoan kuter batez egindako ebakiak zituela, baina gizonezkoak alde egin zuen ordurako.
Emakumea Basurtuko ospitalera eraman zuten, eta ikerketa abiarazi zuten gizona atzemateko. Joan den ostegunean atxilotu zuten, Eibarren (Gipuzkoa), eta, atxilotu ondoren, Eibarko guardiako epailearen esku utzi zuten. Orain, epaileak ustezko erasotzailea espetxeratzeko agindu du.