Espainiako Poliziak 46 urteko gizon bat atxilotu du gaur Gasteizen, haur pornografia edukitzea eta zabaltzea leporatuta. Poliziak susmatzen zuen gizonak haur pornografiako edukiak zabaltzen zituela Internet bidez, eta, epailearen agindua lortu ondoren, haren etxera sartu dira. Zehazki, haur pornografiako 140.000 artxibo inguru topatu dizkiote.
Gasteizko Laugarren Instrukzio epaitegiak zuzendu du gaurko operazioa. Aurrez, poliziaren ziberdelinkuentzia unitateak detektatua zuen, hain zuzen, eduki pedofiloak deskargatu eta zabaltzen zituztela etxebizitza horretatik. Duela bost hilabete hasi zuen Poliziak ikerketa. Gisa horretako edukiak sarean atzemateko, edukiak trukatzeko peer to peer sareak arakatzen dituzte, eta hala aurkitu zuten haur pornografiako edukiak zituen Gasteizko IParen helbidea.
