Donostiako Udaltzaingoak gizon bat atxilotu du gaur, Easo plazako aparkaleku batean emakume bati sexu erasoa egitea egotzita. Erasoa bart gertatu da, hiri erdialdean dagoen lurpeko aparkaleku batean.
Biktimak azaldu duenez, erasotzailea hurreratu egin zen eta sexu erasoa egin zion; ondoren, ihes egin zuen. Donostiako Udaltzaingoak azaldu du biktimak berak eskatu ziela laguntza inguruan zeuden udaltzain batzuei. Osasun zentro batera eraman zuten jarraian.
Poliziek akusatua identifikatu ahal izan dute, emakumeak emandako deskribapenari esker, eta gaur atxilotu dute, 11:00 aldera, bere etxean. Biktimak salaketa jarri du, eta akusatua Ertzaintzaren egoitzan dago orain.
Donostiako Udalak «erabateko irmotasunez» gaitzetsi du erasoa, eta biktimari «babesa eta elkartasuna» eskaini dizkio, adierazpen instituzional baten bidez. Elkarretaratzera ere deitu du biharko, 12:30ean, Alderdi Ederreko lorategian. Herritarrak deitu ditu bertan parte hartzera.
