Azaroaren amaieran egin zuten Hego Euskal Herriko elikagai bankuek bilketa handia, eta, oro har, pozik daude lortutako emaitzarekin. Jasotakoa 77.000 pertsonaren artean banatuko dute. Elikagai eta bestelakoez gain, bonuak edota dirua emateko aukera izan dute herritarrek.
Gipuzkoako Elikagaien Bankuak adierazi duenez, pandemia aurreko datuetara ailegatu dira. Bilketa handian 240 tona janari jaso dituzte. Horrez gain, 305.000 euro lortu dituzte bonutan, eta 85.000 euro dohainetan. Aurreko urteko datuekin alderatuta, %20 handitu da emaitza. Elikagai Bankuak gizartearen erantzuna eskertu du. Izan ere, aurten dohaintzak «askoz eskuzabalagoak» izan direla onartu du, inflazioa dela-eta kiloen balioa areagotu egin delako.
Bizkaiko Elikagai Bankuak ere balorazio positiboa egin du. 300.000 kilo janari bildu dituzte, eta beste 600.000 kilo bonutan. Euro bakoitzak kilo bat ordezkatuko du. Milioi bateko helburua zuten, eta ederki gerturatu dira. Are gehiago, 2019ko datua gainditu dute.
Araban, berriz, 50.000 kilo janari jaso dituzte. Horrez gain, 75.000 euro bildu dituzte kontuan, eta beste 50.000 euro bonutan.
Nafarroan, 250.000 kilo inguru bildu dituzte, horietatik 172.000 euro kontuan, eta 70.000 euro, berriz, bonutan.
