Gipuzkoako Foru Aldundiak igandeko 22:00etan hasiko ditu GI-636 errepidean Gaintxurizketan oinezkoek errepidea gainetik pasatzeko behin-behineko pasabide baten lanak. Inguru horretan istripu eta hildako asko izan dira —tartean oinezkoak—, eta bizilagunek segurtasun neurriak eskatu izan dituzte.
2023ko urtarrilaren 5etik iazko abuztuaren 5era bitarte zazpi pertsona hil ziren Lezo eta Errenteria batzen dituen bidean, GI-636 errepidean. Horietatik bost auto eta moto istripuetan zendu ziren. Beste biak, oinez, errepidearen alde batetik bestera pasatzen ari zirela ibilgailu batek harrapatuta; izan ere, tarte horretan ez dago oinezkoentzako biderik, ezta alde batetik bestera pasatzeko zebra biderik ere.
