Getxoko Udalak mozio baten bidez onartu du frankismoaren krimenen aurkako Argentinako kereilan akusazio gisa agertzea.
Mozioa GUK taldeak aurkeztu zuen, alegia, Ahal Dugu, Ezker Anitza-IU, Equo eta independenteak, eta EH Bilduk osatutako taldeak. Proposamena aurrera eraman duten bi taldeen aldeko botoaren bidez onartu dute.
Udalean agintean dauden bi alderdiak, EAJ eta PSE, abstenitu egin dira. Gauza bera egin du Ciudadanos alderdiko zinegotzi bakarrak. PPkoek, ordea, kontra bozkatu dute.
2010eko apirilean aurkeztu zuten frankismoaren krimenen aurkako kereila. Ordutik, buru-belarri aritu dira hainbat erakunderi krimen horiek aztertzeko eskatzen. Europako Parlamentuari ere egin zioten eskaera, argudiatuta frankismoaren biktimak ez dituztela tratatu nazismoarenak eta faxismoarenak tratatu dituzten modu berean.
